Saturday, April 1, 2023

Restolex ಹಾಸಿಗೆ ತಯಾರಿಕಾ ಕಾರ್ಖಾನೆಯಲ್ಲಿ ಅಗ್ನಿ ದುರಂತ


 ನೆಲಮಂಗಲ ಸಮೀಪದ ಟಿ ಬೇಗೂರು ಗ್ರಾಮದಲ್ಲಿ Restolex ಎಂಬ ಹಾಸಿಗೆ ತಯಾರಿಕಾ ಕಾರ್ಖಾನೆಯಲ್ಲಿ ಅಗ್ನಿ ಅವಘಡ ಸಂಭವಿಸಿದ್ದು, ಅಪಾರ ಪ್ರಮಾಣದ ಮಿಷನರಿ, ಕಚ್ಛಾ ಮತ್ತು ಸಿದ್ಧ ವಸ್ತುಗಳು ಬೆಂಕಿಗಾಹುತಿಯಾಗುವುದರ ಜೊತೆಗೆ ಕಟ್ಟಡವೂ ಕೂಡ ಹೆಚ್ಚಿನ ಪ್ರಮಾಣದಲ್ಲಿ ಹಾಳಾಗಿದೆ.

ವಿಷಯ ತಿಳಿದ ಕೂಡಲೇ ನೆಲಮಂಗಲ, ಪೀಣ್ಯ ಹಾಗೂ ಯಶವಂತಪುರ ಅಗ್ನಿಶಾಮಕ ಸಿಬ್ಬಂದಿಯವರು ಸ್ಥಳಕ್ಕೆ ಧಾವಿಸಿ, ಶಿಥಿಲಗೊಂಡಿದ್ದ ಕಟ್ಟಡದ ಒಳಗೆ ಮೈ ಮೇಲೆ ಕಟ್ಟಡ ಬೀಳುವ ಸ್ಥಿತಿಯಲ್ಲಿದ್ದರೂ ಸಹ ಪ್ರಾಣದ ಹಂಗು ತೊರೆದು 5-7 ಗಂಟೆಗಳ ಕಾರ್ಯಾಚರಣೆ ನಡೆಸಿ ಬೆಂಕಿ ನಂದಿಸುವಲ್ಲಿ ಯಸ್ವಿಯಾಗಿದ್ದಾರೆ.


- ರೇವಣ್ಣ ಎಂ ಬೈರಶೆಟ್ಟಹಳ್ಳಿ



Tuesday, February 7, 2023

ಅತ್ಯಂತ ವಿಜೃಂಭಣೆಯಿಂದ ಜರುಗಿದ ಗುಡಿ ಸರಗೂರು ಶ್ರೀ ಬಸವೇಶ್ವರ ಸ್ವಾಮಿಯ ಜಾತ್ರಾ ಮಹೋತ್ಸವ 2023


ಅತ್ಯಂತ ವಿಜೃಂಭಣೆಯಿಂದ ಜರುಗಿದ ಗುಡಿ ಸರಗೂರು ಶ್ರೀ ಬಸವೇಶ್ವರ ಸ್ವಾಮಿಯ ಜಾತ್ರಾ ಮಹೋತ್ಸವ 2023


#revannam #Saragur Konda #ಸರಗೂರು ಕೊಂಡ

300 ವರ್ಷಗಳಿಗಿಂತಲೂ ಹೆಚ್ಚಿನ ಇತಿಹಾಸ ಇರುವ ಪುರಾಣ ಪ್ರಸಿದ್ಧವಾದ ಗುಡಿಸರಗೂರು ಶ್ರೀ ಬಸವೇಶ್ವರ ಸ್ವಾಮಿ ಜಾತ್ರಾಮಹೋತ್ಸವ, ಕೊಂಡ ಹಾಗೂ ತೆಪ್ಪೋತ್ಸವವು 14-15 ಫೆಬ್ರವರಿ 2022ರ ಸೋಮವಾರ ಮತ್ತು ಮಂಗಳವಾರ ಅತ್ಯಂತ ವಿಜೃಂಭಣೆಯಿಂದ ನಡೆದಿರುತ್ತದೆ.

#RevannaM #Saragurkonda2023 India's tallest firewalking #Saragur jathre #firewalking
ಶ್ರೀ ಬಸವೇಶ್ವರ ಸ್ವಾಮಿ ದೇವಸ್ಥಾನವು ರಾಮನಗರ ಜಿಲ್ಲೆ ಚನ್ನಪಟ್ಟಣ ತಾಲ್ಲೂಕು ವಿರುಪಾಕ್ಷಿಪುರ ಹೋಬಳಿಯ ಗುಡಿಸರಗೂರು ಗ್ರಾಮದಲ್ಲಿದೆ.


#SaraguruKonda #sargur konda #Sargur konda 2023

#ಸರಗೂರು ಶ್ರೀ ಬಸವೇಶ್ವರ ಸ್ವಾಮಿ ಕೊಂಡ ಸರಿಸುಮಾರು 40 ಅಡಿ ಎತ್ತರ 100 ಅಡಿಗಳಷ್ಟು ಉದ್ದವಿರುವ ಸರಗೂರು ಕೊಂಡವು ಕರ್ನಾಟಕದಲ್ಲೇ ಅತಿ ಎತ್ತರದ ಪ್ರತಿವರ್ಷ ನಡೆಯುವ ಕೊಂಡವಾಗಿರುತ್ತದೆ.

#Firewalling
ಬಸವೇಶ್ವರ ಸ್ವಾಮಿ ದೇವಾಲಯದಲ್ಲಿ ಭಕ್ತರನ್ನು ಸೂಜಿಗಲ್ಲಿನಂತೆ ಸೆಳೆಯುವ ಪುರಾತನವಾದ (ನಂಜುಂಡೇಶ್ವರ) ಶಿವಲಿಂಗವಿದ್ದು ಶಿವಲಿಂಗದ ಅಭಿಷೇಕವೂ ನಯನ ಮನೋಹರವಾಗಿರುತ್ತದೆ.



#Saraguru jathre #Saragur Konda #Saragur jathre #Saraguru #Basaveshwara #Temple Google Map: https://maps.app.goo.gl/HPZ9atgTerU825x39

Saturday, December 3, 2022

ಚನ್ನಪಟ್ಟಣದ ಹಿರಿಯ ಸಾಹಿತ್ಯ ಪರಿಷತ್ ರಾಮನಗರ ಜಿಲ್ಲಾಧ್ಯಕ್ಷ, ಜೆಡಿಎಸ್​ ಮುಖಂಡ ಸಿಂ.ಲಿಂ.ನಾಗರಾಜ್ ಅವರ ನಿಧನ


ಸಿಂಗರಾಜಪುರ ಸಿಂ ಲಿಂ ನಾಗರಾಜುರವರ ನಿವಾಸ




 ರಾಮನಗರ: ಚನ್ನಪಟ್ಟಣದ ಹಿರಿಯ ಜೆಡಿಎಸ್​ ಮುಖಂಡ ಸಿಂ.ಲಿಂ.ನಾಗರಾಜ್​ ಅವರು ಹೃದಯಾಘಾತದಿಂದ ನಿಧನರಾಗಿದ್ದು ಮಾಜಿ ಸಿಎಂ ಹೆಚ್‌ ಡಿ ಕುಮಾರಸ್ವಾಮಿ ಸೇರಿದಂತೆ ಅನೇಕ ಗಣ್ಯರು ಸಂತಾಪ ಸೂಚಿಸಿದ್ದಾರೆ.

 ಮಾಜಿ ಪ್ರಧಾನಿ ಹೆಚ್​ ಡಿ ದೇವೇಗೌಡರ ಒಡನಾಡಿಯಾಗಿದ್ದ ನಾಗರಾಜ್​ ಪಕ್ಷ ನಿಷ್ಠೆಗೆ ಹೆಸರುವಾಸಿಯಾಗಿದ್ದರು. 2011ರ ಚನ್ನಪಟ್ಟಣ ಉಪ ಚುನಾವಣೆಯಲ್ಲಿ ಸಿ.ಪಿ. ಯೋಗೇಶ್ವರ್ ವಿರುದ್ಧ ಸ್ಪರ್ಧಿಸಿದ್ದರು. ಜೊತೆಗೆ ಕನ್ನಡ ಸಾಹಿತ್ಯ ಪರಿಷತ್ತಿನ ಜಿಲ್ಲಾ ಘಟಕದ ಅಧ್ಯಕ್ಷರಾಗಿ ಕೂಡ ಸೇವೆ ಸಲ್ಲಿಸಿದ್ದಾರೆ. ಇಂದು ಸಂಜೆ ಸಿಂಗರಾಜಿಪುರದಲ್ಲಿ ಅವರ ಅಂತ್ಯಕ್ರಿಯೆ ನಡೆಯಲಿದೆ.

Saturday, October 8, 2022

67th South Filmfare Awards 2022: ಕರ್ನಾಟಕದಲ್ಲಿ ಮೊದಲ ಬಾರಿಗೆ, ನಾಳಿನ ಈವೆಂಟ್ ಬಗ್ಗೆ ಇಲ್ಲಿದೆ ಹೆಚ್ಚಿನ ಮಾಹಿತಿ..

ಪ್ರತಿಷ್ಠಿತ 67ನೇ ಫಿಲ್ಮ್​ಫೇರ್ ಅವಾರ್ಡ್ಸ್‌ 2022 ಈ ಸಲ ಬೆಂಗಳೂರಿನಲ್ಲಿ ನಡೆಯಲಿದೆ. ಅಚ್ಚರಿಯ ವಿಚಾರ ಏನೆಂದರೆ, ಇಷ್ಟು ವರ್ಷಗಳಲ್ಲಿ ಇದೇ ಮೊದಲ ಬಾರಿಗೆ ಕರ್ನಾಟಕದಲ್ಲಿ ಈ ಅವಾರ್ಡ್‌ ಕಾರ್ಯಕ್ರಮ ನಡೆಯಲು ಭರ್ಜರಿ ಸಿದ್ಧತೆ ನಡೆಯುತ್ತಿದೆ.

ಇದೇ ಅಕ್ಟೋಬರ್‌ 9ರಂದು 67ನೇ ಸೌತ್‌ ಫಿಲ್ಮ್​ಫೇರ್ ಅವಾರ್ಡ್ಸ್‌ ಕಾರ್ಯಕ್ರಮ ಬೆಂಗಳೂರಿನಲ್ಲಿ ಮೊದಲ ಸಲ ಆಯೋಜನೆಗೊಳ್ಳುತ್ತಿದೆ. ಸ್ಯಾಂಡಲ್‌ವುಡ್‌ ಇಂಡಸ್ಟ್ರಿಯ ಜತೆಗೆ ಸೌತ್‌ನ ತೆಲುಗು, ತಮಿಳು ಮತ್ತು ಮಲಯಾಳಂ ಸಿನಿಮಾ ಮಂದಿಯೂ ಈ ಕಾರ್ಯಕ್ರಮದಲ್ಲಿ ಹಾಜರಿರಲಿದ್ದಾರೆ. ಬಾಲಿವುಡ್‌ನ ಕೆಲವರೂ ಆಗಮಿಸುತ್ತಿದ್ದಾರೆ.

ಕನ್ನಡದ ಪ್ರತಿಯೊಬ್ಬ ಹಿರಿಯ ನಟರಿಗೆ ಆಮಂತ್ರಣ..

ಇನ್ನು ಬೆಂಗಳೂರಿನಲ್ಲಿಯೇ ಈ ಸಲದ ಈ ಕಾರ್ಯಕ್ರಮ ನಡೆಯುತ್ತಿರುವುದರಿಂದ ಕನ್ನಡ ಸಿನಿಮಾ ಇಂಡಸ್ಟ್ರಿಗೆ ದುಡಿದ ಪ್ರತಿಯೊಬ್ಬ ಹಿರಿಯ ನಟ-ನಟಿಯರಿಗೂ ಅವರ ಮನೆ ಮನೆಗೆ ತೆರಳಿ ಆಮಂತ್ರಣ ನೀಡಲಾಗಿದೆ. ಒಟ್ಟಾರೆಯಾಗಿ 20 ಸಾವಿರಕ್ಕೂ ಅಧಿಕ ಮಂದಿ ಕೂರುವ ವ್ಯವಸ್ಥೆ ಮಾಡಲಾಗಿದೆ. ಪಬ್ಲಿಕ್‌ ವೀಕ್ಷಣೆಗೆ ಬುಕ್‌ ಮೈ ಶೋದಲ್ಲಿ ಟಿಕೆಟ್‌ ವ್ಯವಸ್ಥೆ ಇದೆ. ಫಿಲಂ ಚೇಂಬರ್‌ನಲ್ಲಿಯೂ ಸಾವಿರ ಟಿಕೆಟ್‌ ನೀಡಿದ್ದೇವೆ. ಸಂಜೆ 4.30ರಿಂದ ರೆಡ್‌ ಕಾರ್ಪೆಟ್‌ ಶುರುವಾದರೆ, ಮಧ್ಯರಾತ್ರಿವರೆಗೂ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮ ನಡೆಯಲಿದೆ.

  • ಅಕ್ಟೋಬರ್‌ 9ರಂದು ಸಂಜೆ 4.30ಕ್ಕೆ ತುಮಕೂರು ರಸ್ತೆಯಲ್ಲಿನ ಬೆಂಗಳೂರು ಇಂಟರ್‌ನ್ಯಾಷನಲ್‌ ಎಕ್ಸಿಬಿಷನ್‌ ಸೆಂಟರ್‌ನಲ್ಲಿ ರೆಡ್‌ ಕಾರ್ಪೆಟ್‌ ಕಾರ್ಯಕ್ರಮ ನಡೆಯಲಿದ್ದು, ಈ ಕೆಂಪು ಹಾಸಿನ ಮೇಲೆ ಪೂಜಾ ಹೆಗ್ಡೆ, ಮೃಣಾಲ್ ಠಾಕೂರ್, ಕೃತಿ ಶೆಟ್ಟಿ, ಸಾನಿಯಾ ಐಯಪ್ಪನ್, ಐಂದ್ರಿತಾ ರೇ, ಸುಕುಮಾರ್ ಬಂಡ್ರೆಡ್ಡಿ, ತಬಿತಾ ಬಂಡ್ರೆಡ್ಡಿ, ನವೀನ್ ಯೆರ್ನೇನಿ, ಟಬು, ಆರ್ ಮಾಧವನ್, ಮುರಳಿ ಶರ್ಮಾ, ನಾನಿ, ಚಿತ್ರ ಗಾಯಕ, ಡಿಎಸ್ಪಿ, ಕೆ ಮಣಿಕಂದನ್, ಅಲ್ಲು ಅರ್ಜುನ್ ಮತ್ತು ಇತರರು ಆಗಮಿಸಲಿದ್ದಾರೆ.

ಸಿಎಂ ಬೊಮ್ಮಾಯಿ ಮುಖ್ಯ ಅತಿಥಿ..

ಈ ಅವಾರ್ಡ್‌ ಕಾರ್ಯಕ್ರಮದ ಬಗ್ಗೆ ಹೆಚ್ಚಿನ ಮಾಹಿತಿ ನೀಡುವ ಕಮರ್‌ ಫಿಲಂ ಫ್ಯಾಕ್ಟರಿಯ ಕಮರ್‌, ಫಿಲ್ಮ್​ಫೇರ್ ಅವಾರ್ಡ್‌ ಕಾರ್ಯಕ್ರಮವನ್ನು ಬೆಂಗಳೂರಿಗೆ ತರಬೇಕು ಎಂದು 2018ರಲ್ಲಿಯೇ ಪ್ಲಾನ್‌ ಆಗಿತ್ತು. ಆದರೆ, ಆಗ ಅದು ಸಾಧ್ಯವಾಗಲಿಲ್ಲ. ಚೆನ್ನೈ, ಹೈದರಾಬಾದ್‌ಗಷ್ಟೇ ಸೀಮಿತವಾಗಿತ್ತು. ಕೊನೆಗೆ ಕೊವೀಡ್‌ ಬಂತು, ಬಳಿಕ ಶತಾಯಗತಾಯ ಪ್ರಯತ್ನದಿಂದ ಬೆಂಗಳೂರಿಗೆ ಮೊದಲ ಸಲ ಈ ಕಾರ್ಯಕ್ರಮ ತರುತ್ತಿದ್ದೇವೆ. ಸಿಎಂ ಬಸವರಾಜ್‌ ಬೊಮ್ಮಾಯಿ ಅವರು ಮುಖ್ಯ ಅತಿಥಿಗಳಾಗಿ ಆಗಮಿಸುತ್ತಿದ್ದಾರೆ" ಎನ್ನುತ್ತಾರೆ.


Sunday, May 8, 2022

ಗ್ಯಾಸ್ ಸಿಲಿಂಡರ್ ಸೋರಿಕೆ: ಸ್ವಲ್ಪ ಯಾಮಾರಿದರೂ ಅಪಾಯ ಕಟ್ಟಿಟ್ಟ ಬುತ್ತಿ!

 ಗ್ಯಾಸ್ ಸಿಲಿಂಡರ್ ಸೋರಿಕೆ: ಸ್ವಲ್ಪ ಯಾಮಾರಿದರೂ ಅಪಾಯ ಕಟ್ಟಿಟ್ಟ ಬುತ್ತಿ!

ಗ್ಯಾಸ್ ಇಲ್ಲದೆ ಇಂದಿನ ದಿನಗಳಲ್ಲಿ ಅಡುಗೆ ಕೆಲಸಗಳು ನಡೆಯುವುದು ಅಸಾಧ್ಯವೆನ್ನಬಹುದು. ಹೆಚ್ಚಾಗಿ ಪ್ರತಿಯೊಂದು ಮನೆಯಲ್ಲಿ ಗ್ಯಾಸ್ ಇದ್ದೇ ಇರುತ್ತದೆ. ಇದನ್ನು ಬಳಸಲು ಸುಲಭ ಹಾಗೂ ವೇಗವಾಗಿ ಇದು ಅಡುಗೆ ಮಾಡಲು ನೆರವಾಗುವುದು.



ಹೀಗಾಗಿ ಪ್ರತಿಯೊಬ್ಬರು ಗ್ಯಾಸ್ ಗೆ ಮೊರೆ ಹೋಗುವರು. ಆದರೆ ಇದನ್ನು ಬಳಸುವ ಸಂದರ್ಭದಲ್ಲಿ ಕೆಲವೊಂದು ಮುನ್ನೆಚ್ಚರಿಕೆ ಕ್ರಮಗಳನ್ನು ತೆಗೆದುಕೊಳ್ಳುವುದು ಅತೀ ಅಗತ್ಯ.

ಅದರಲ್ಲೂ ಗ್ಯಾಸ್ ಸೋರಿಕೆ ಆದರೆ, ಆಗ ತುಂಬಾ ಜಾಗೃತೆ ವಹಿಸಬೇಕು. ಇಲ್ಲವಾದಲ್ಲಿ ಇಡೀ ಮನೆ ಮತ್ತು ಪ್ರಾಣಕ್ಕೂ ಹಾನಿ ಆಗಬಹುದು. ಕೆಲವೊಂದು ಸಿಲಿಂಡರ್ ಗಳಲ್ಲಿ ಗ್ಯಾಸ್ ಸೋರಿಕೆಯು ಆಗುತ್ತಲಿರುವುದು. ಇದನ್ನು ತಪ್ಪಿಸುವ ಕೆಲವೊಂದು ಕ್ರಮಗಳನ್ನು ತಿಳಿಯಿರಿ.
ರೆಗ್ಯುಲೇಟರ್ ಸರಿಯಾಗಿ ಮರುಪರಿಶೀಲಿಸಿ
undefined

  • ಸರಿಯಾಗಿ ರಬ್ಬರನ್ನು ಹಾಕದೆ ಇದ್ದರೆ ಆಗ ಗ್ಯಾಸ್ ಲೀಕ್ ಆಗಬಹುದು. ಇದು ಗ್ಯಾಸ್ ಸಿಲಿಂಡರ್ ನ್ನು ಗ್ಯಾಸ್ ಸ್ಟವ್ ಗೆ ಸಂಪರ್ಕಿಸುವುದು.
  • ರೆಗ್ಯೂಲೇಟರ್ ನ್ನು ಸರಿಯಾಗಿ ಅಳವಡಿಸದೆ ಇರುವುದು ಮತ್ತು ಗ್ಯಾಸ್ ಪರಿಕರಗಳನ್ನು ಸೂಕ್ತ ರೀತಿಯಲ್ಲಿ ನಿರ್ವಹಣೆ ಮಾಡದೆ ಇರುವುದು ಕೂಡ ಗ್ಯಾಸ್ ಸೋರಿಕೆಗೆ ಕಾರಣವಾಗಬಹುದು.
  • ಅಡುಗೆ ಮಾಡುವಂತಹ ಸಂದರ್ಭದಲ್ಲಿ ಗ್ಯಾಸ್ ಮೇಲಿಟ್ಟಿರುವ ಹಾಲು, ಚಾ, ಕಾಫಿ ಇತ್ಯಾದಿಗಳು ಅತಿಯಾಗಿ ಕುದಿಯುವ ಪರಿಣಾಮ ಸೋರಿಕೆ ಆಗಿ ಗ್ಯಾಸ್ ಮೇಲೆ ಬಿದ್ದು ಮುಂದೆ ಅದು ಸೋರಿಕೆ ಉಂಟು ಮಾಡಬಹುದು.

  • ಎಲ್ ಪಿಜಿ ಸೋರಿಕೆಯಿಂದ ಯಾವೆಲ್ಲಾ ಅಪಾಯಗಳು ಇವೆ?
undefined

ಎಲ್ ಪಿಜಿ ಗ್ಯಾಸ್ ಬೇಗೆ ಹೊತ್ತಿ ಉರಿಯುವುದು. ಗ್ಯಾಸ್ ಸೋರಿಕೆಯಿಂದಾಗಿ ಎರಡು ರೀತಿಯ ಆರೋಗ್ಯ ಸಮಸ್ಯೆಗಳು ಕಾಡಬಹುದು.

ಗ್ಯಾಸ್ ನಿಂದಾಗಿ ಉಸಿರುಕಟ್ಟುವಿಕೆ

  • ಗ್ಯಾಸ್ ಗಾಳಿಯಲ್ಲಿ ಬೆರೆತು, ಅದನ್ನು ಉಸಿರಾಡಿದ ವೇಳೆ ಅದು ಶ್ವಾಸಕೋಶಕ್ಕೆ ಪ್ರವೇಶ ಮಾಡುವುದು ಮತ್ತು ಅದರಿಂದ ಉಸಿರಾಟದ ತೊಂದರೆ ಆಗಬಹುದು.
  • ಇದು ಮೆದುಳು ಮತ್ತು ನರ ವ್ಯವಸ್ಥೆ ಮೇಲೆ ದಾಳಿ ಮಾಡುವುದು ಹಾಗೂ ಇದರಿಂದ ಯುಪೋರಿಯಾ (ಸಂತೋಷದ ಭಾವನೆ), ಮಾತನಾಡಲು ಮತ್ತು ನಡೆಯಲು ಕಷ್ಟವಾಗುವುದು, ನಿಶ್ಯಕ್ತಿ, ಸಹಕಾರದ ಕೊರತೆ, ವಾಕರಿಕೆ ಮತ್ತು ಪ್ರಜ್ಞೆ ತಪ್ಪಬಹುದು. ಪದೇ ಪದೇ ಹೀಗೆ ಆದರೆ ಅದರಿಂದ ಮನಸ್ಥಿತಿ ಬದಲಾವಣೆ, ಖಿನ್ನತೆ, ಮೆದುಳಿಗೆ ಆಘಾತ ಮತ್ತು ನೆನಪಿನ ಶಕ್ತಿ ಕುಂದಬಹುದು.
  • ಇದು ಎದಬಡಿತದಲ್ಲಿ ಅನಿಯಮಿತತೆಯನ್ನು ಉಂಟು ಮಾಡುವುದು ಮತ್ತು ಅಧಿಕ ರಕ್ತದೊತ್ತಡಕ್ಕೂ ಕಾರಣವಾಗಬಹುದು. ಕೆಂಪು ರಕ್ತದ ಕಣಗಳನ್ನು ಕಡಿಮೆ ಮಾಡಿ, ಶ್ವಾಸಕೋಶಕ್ಕೆ ಹಾನಿ, ಯಕೃತ್ ಮತ್ತು ಕಿಡ್ನಿಯಲ್ಲಿ ಉರಿಯೂತ ಉಂಟು ಮಾಡಬಹುದು.

  • ಸುಟ್ಟು ಹೋಗಬಹುದು
undefined
  • ಗ್ಯಾಸ್ ಸೋರಿಕೆ ವೇಳೆ ಸ್ವಲ್ಪ ಪ್ರಮಾಣದಲ್ಲಿ ಬೆಂಕಿ ಸಿಕ್ಕರೂ ಅದರಿಂದ ದೊಡ್ಡ ಮಟ್ಟದ ಹಾನಿ ಆಗುವುದು. ಇದರಿಂದ ಸುಟ್ಟ ಗಾಯವಾಗಬಹುದು ಮತ್ತು ಅಪರೂಪದಲ್ಲಿ ಸಾವು ಸಂಭವಿಸಬಹುದು. ಸ್ಫೋಟದ ಜಾಗದಲ್ಲಿದ್ದರೆ ಆಗ ವ್ಯಕ್ತಿಯ ಕಿವಿಗಳು, ಶ್ವಾಸಕೋಶ ಮತ್ತು ಜಠರಕರುಳಿನ ಇತರ ಅಂಗಾಂಗಗಳ ಮೇಲೆ ಹಾನಿ ಮಾಡಬಹುದು.
  • ಶ್ವಾಸಕೋಶವು ಹಾನಿಯಾಗಿ, ಅದರಿಂದ ಊತ ಮತ್ತು ರಕ್ತಸ್ರಾವ ಆಗಬಹುದು. ಸ್ಫೋಟದಿಂದಾಗಿ ಬೇರೆ ವಸ್ತುಗಳು ಗಾಳಿಯಲ್ಲಿ ಹಾರಿಕೊಂಡು ಹೋಗಿ ಅದರಿಂದ ಹಾನಿ ಆಗಬಹುದು.
  • ಮಕ್ಕಳು, ವಯಸ್ಕರು ಇದ್ದರೆ ಅದರಿಂದ ಈ ವಸ್ತುಗಳು ಬಿದ್ದು ದೊಡ್ಡ ಪ್ರಮಾಣದ ಗಾಯ ಆಗಬಹುದು. ನರದ ಸಮಸ್ಯೆ ಮತ್ತು ಮೆದುಳಿಗೆ ಗಾಯವಾಗುವ ಸಾಧ್ಯತೆಗಳು ಇರುವುದು. ಕೆಲವರಿಗೆ ಸ್ಫೋಟದ ಬಳಿಕ ಆಘಾತದಿಂದ ಚೇತರಿಸಿಕೊಳ್ಳಲು ತುಂಬಾ ಸಮಯ ಬೇಕಾಗಬಹುದು.

​ಗ್ಯಾಸ್ ಸೋರಿಕೆ ಆದರೆ ಏನು ಮಾಡಬೇಕು?

undefined
  • ಸಣ್ಣ ಬೆಂಕಿಯ ಕಿಡಿಯು ಗ್ಯಾಸ್ ಸೋರಿಕೆ ವೇಳೆ ತುಂಬಾ ದೊಡ್ಡ ಅನಾಹುತ ಉಂಟು ಮಾಡಬಹುದು. ಹೀಗಾಗಿ ಈ ಕ್ರಮಗಳನ್ನು ಪಾಲಿಸಿಕೊಂಡು ಹೋಗಿ.
  • ಗ್ಯಾಸ್ ಸೋರಿಕೆಯ ಸಂಶಯವಾದರೆ, ಆಗ ಎಲ್ಲಾ ರೀತಿಯ ಬೆಂಕಿ ನಂದಿಸಿ ಬಿಡಿ.
  • ಎಲ್ ಪಿಜಿ ರೆಗ್ಯೂಲೇಟರ್ ನ್ನು ಆಫ್ ಮಾಡಿ ತೆಗೆಯಿರಿ ಮತ್ತು ಸಿಲಿಂಡರ್ ಗೆ ಕ್ಯಾಪ್ ಹಾಕಿ.
  • ಬೆಂಕಿ ಕಡ್ಡಿ ಹಚ್ಚಬೇಡಿ.
  • ಈ ಸಂದರ್ಭದಲ್ಲಿ ಯಾವುದೇ ಸ್ವಿಚ್ ಹಾಕಲು ಹೋಗಬೇಡಿ.
  • ಬಾಗಿಲು ಮತ್ತು ಕಿಟಕಿಗಳನ್ನು ಮೊದಲಿಗೆ ತೆರೆಯಿರಿ.
  • ಮನೆಯ ವಿದ್ಯುತ್ ಸಂಪರ್ಕವನ್ನು ಕಡಿತ ಮಾಡಿ.
  • ಗ್ಯಾಸ್ ವಿತರಕರು ಅಥವಾ ಅಗ್ನಿಶಾಮಕ ದಳದವರನ್ನು ಸಂಪರ್ಕಿಸಿ.

​ಪ್ರಥಮ ಚಿಕಿತ್ಸೆ

undefined
  • ಗ್ಯಾಸ್ ಸೋರಿಕೆ ವೇಳೆ ಅದನ್ನು ಉಸಿರಾಡಿದ್ದರೆ, ಆಗ ಅವರನ್ನು ತಾಜಾ ಗಾಳಿಯಾಡುವ ಜಾಗಕ್ಕೆ ಕರೆದುಕೊಂಡು ಹೋಗಿ. ಅವರಿಗೆ ಹಿತಕರ ಆಗಿರುವಂತೆ ಮಾಡಿ. ಅಗತ್ಯವಿದ್ದರೆ, ಕೃತಕ ಉಸಿರಾಟದ ವ್ಯವಸ್ಥೆ ಮಾಡಿ.
  • ಗ್ಯಾಸ್ ಬಟ್ಟೆಗೆ ತಾಗಿದ್ದರೆ, ಆಗ ನೀವು ಆ ಬಟ್ಟೆಯನ್ನು ತಕ್ಷಣವೇ ತೆಗೆಯಿರಿ. ಇದನ್ನು ನೀರಿಗೆ ಹಾಕಿ ಮತ್ತು 30 ನಿಮಿಷ ಕಾಲ ಹಾಗೆ ಬಿಡಿ ಮತ್ತು ವೈದ್ಯರ ನೆರವು ಪಡೆಯಿರಿ.
  • ಕಣ್ಣಿಗೆ ತಾಗಿದ್ದರೆ ಆಗ ನೀವು ನೀರಿನಿಂದ ಕಣ್ಣುಗಳನ್ನು ಸರಿಯಾಗಿ ತೊಳೆಯಿರಿ. ಹೀಗೆ 20 ನಿಮಿಷ ಕಾಳ ಮಾಡಿ. ಲೆನ್ಸ್ ಇದ್ದರೆ ತೆಗೆಯಿರಿ. ನೀವು ಹಾಗೆ ವೈದ್ಯರ ನೆರವು ಪಡೆಯಬಹುದು.
  • ಕಾರ್ಬನ್ ಡೈಆಕ್ಸೈಡ್, ಒಣ ರಾಸಾಯನಿಕ ಮತ್ತು ನೀರಿನ ಸ್ಪ್ರೇಯಿಂದ ಇದನ್ನು ನಂದಿಸಬಹುದು. ಗ್ಯಾಸ್ ಸೋರಿಕೆ ಆಗುತ್ತಿರುವ ಭಾಗಕ್ಕೆ ನೀರು ಹಾಕಬೇಡಿ. ಹೊತ್ತಿ ಉರಿಯುವಂತಹ ಯಾವುದೇ ವಸ್ತುಗಳು ಇದ್ದರೆ, ಆಗ ನೀವು ಅವುಗಳನ್ನು ಅಲ್ಲಿಂದ ತೆಗೆಯಿರಿ. ಜನರನ್ನು ಈ ಭಾಗದಿಂದ ದೂರ ಸರಿಯಲು ಹೇಳಿ.

​ಮುನ್ನೆಚ್ಚರಿಕೆಗಳು

undefined
  • ಬಿಸಿಲು ತಾಗದಂತೆ ಯಾವಾಗಲೂ ಸಿಲಿಂಡರ್ ಗಳನ್ನು ಶೇಖರಣೆ ಮಾಡಬೇಕು. ಬಿಸಿಲಿಗೆ ಶಾಕದಿಂದ ಇದು ಬೆಂಕಿ ಹತ್ತಿಕೊಳ್ಳಬಹುದು.
  • ಚರ್ಮ ಮತ್ತು ಕಣ್ಣಿನ ಸಂಪರ್ಕಕ್ಕೆ ಬರದಂತೆ ನೋಡಿಕೊಳ್ಳಿ.
  • ಸರಿಯಾದ ಕ್ರಮದಲ್ಲಿ ಗ್ಯಾಸ್ ಸಿಲಿಂಡರ್ ಗಳನ್ನು ಇಡಬೇಕು. ಇದರಿಂದ ಒತ್ತಡ ಬೀಳುವುದು ಕಡಿಮೆ ಆಗುವುದು.
  • ಗ್ಯಾಸ್ ವಿತರಣೆ ಮಾಡುವವರಲ್ಲಿ ಟ್ಯೂಬ್ ನ್ನು ಸರಿಯಾಗಿ ಪರೀಕ್ಷಿಸಲು ಹೇಳಿ. ಯಾವುದೇ ಸೋರಿಕೆ ಇದ್ದರೆ ಅವರಿಗೆ ತಿಳಿದುಬರಲಿದೆ.
  • ಟ್ಯೂಬ್ ಗಳನ್ನು ನಿಯಮಿತವಾಗಿ ಬದಲಾಯಿಸುತ್ತಾ ಇರಿ.


  • ​ವಿಲೇವಾರಿ
undefined

ಗ್ಯಾಸ್ ಸಿಲಿಂಡರ್ ನಲ್ಲಿ ಸ್ವಲ್ಪ ಪ್ರಮಾಣದ ಗ್ಯಾಸ್ ಇದ್ದರೆ ಆಗ ಅದನ್ನು ತೆಗೆಯುವ ಪ್ರಯತ್ನ ಮಾಡಬೇಡಿ. ಯಾಕೆಂದರೆ ಇದರಿಂದ ಬೆಂಕಿ, ಗಾಯ ಮತ್ತು ಸಾವು ಸಂಭವಿಸಬಹುದು. ಸಿಲಿಂಡರ್ ಬೇಡವಾದರೆ ಆಗ ನೀವು ಅದನ್ನು ಸ್ಥಳೀಯ ವಿತರಕರಿಗೆ ನೀಡಿ. ಇದರಲ್ಲಿ ಇರುವ ಗ್ಯಾಸ್ ನ್ನು ವಿತರಕರು ಸುಲಭವಾಗಿ ತೆಗೆಯುವರು.

Sunday, March 6, 2022

ನಿರ್ಮಾಣ ಹಂತದ ಕಟ್ಟಡದಲ್ಲಿ ಅಗ್ನಿ ಅವಘಡ: ಬೆಂಕಿ ನಂದಿಸುವ ವೇಳೆ ಆಯತಪ್ಪಿ ಬಿದ್ದ ಅಗ್ನಿಶಾಮಕ ಸಿಬ್ಬಂದಿ ವಿನಯ್

ನಿರ್ಮಾಣ ಹಂತದ ಕಟ್ಟಡದಲ್ಲಿ ಅಗ್ನಿ ಅವಘಡ: ಬೆಂಕಿ ನಂದಿಸುವ ವೇಳೆ ಆಯತಪ್ಪಿ ಬಿದ್ದ ಅಗ್ನಿಶಾಮಕ ಸಿಬ್ಬಂದಿ ವಿನಯ್


Fire Accident: ನಿರ್ಮಾಣ ಹಂತದ ಕಟ್ಟಡದಲ್ಲಿ ಅಗ್ನಿ ಅವಘಡ: ಬೆಂಕಿ ನಂದಿಸುವ ವೇಳೆ ಆಯ ತಪ್ಪಿ ಬಿದ್ದ ಅಗ್ನಿಶಾಮಕ ಸಿಬ್ಬಂದಿ


ಬೆಂಗಳೂರಿನಲ್ಲಿ ಅಗ್ನಿ ಅವಘಡಗಳು ಸಂಭವಿಸುತ್ತಲೇ ಇರುತ್ತವೆ. ಅಗ್ನಿಶಾಮಕದಳ ಸಿಬ್ಬಂದಿ ಕ್ಷಣಾರ್ಧದಲ್ಲಿ ಘಟನಾ ಸ್ಥಳಕ್ಕೆ ತೆರಳಿ ರಕ್ಷಣಾ ಕಾರ್ಯದಲ್ಲಿ ತೊಡಗಿಕೊಳ್ಳುತ್ತಾರೆ. ಕೆಲ ದಿನಗಳ ಹಿಂದೆ ಅಗ್ನಿ ಅವಘಡದಲ್ಲಿ ಸಿಲುಕಿದ್ದ ತುಂಬು ಕುಟುಂಬವನ್ನು ಸಿಬ್ಬಂದಿ ರಕ್ಷಣೆ ಮಾಡಿದ್ದರು.

ಶನಿವಾರ ರಾತ್ರಿ ಸುಮಾರು 10.45ರ ವೇಳೆಗೆ ಮಾರತ್ತಹಳ್ಳಿಯ ಕಾರ್ತಿಕ್ ನಗರದಲ್ಲಿರೋ ಬಾಗಮನಿ ಟೆಕ್ ಪಾರ್ಕ್ ನಲ್ಲಿರುವ ಕಟ್ಟಡದಲ್ಲಿ ಬೆಂಕಿ ಕಾಣಿಸಿಕೊಂಡಿತ್ತು.

ಕಟ್ಟಡದ 5 ಮತ್ತು 6ನೇ ಮಹಡಿಯಲ್ಲಿ ಶಾರ್ಟ್ ಸರ್ಕ್ಯೂಟ್ ನಿಂದ ಬೆಂಕಿ ತಗುಲಿರುವ ಶಂಕೆ ವ್ಯಕ್ತವಾಗಿದೆ. ಬೆಂಕಿ ಕಾಣಿಸಿಕೊಂಡ ಭಾಗದಲ್ಲಿ ಲೊಗ್ಯಾಟೋ ಕಂಪನಿಯ ಕೆಲಸಗಳು ನಡೆದಿದ್ದವು.

ಕಟ್ಟಡದೊಳಗೆ ಥರ್ಮಾಕೋಲ್, ಪೇಪರ್ ಮತ್ತು ಫ್ಲೈವುಡ್ ಗಳು ಇದ್ದಿದ್ದರಿಂದ ಬೆಂಕಿ ಬೇಗ ಆವರಿಸಿಕೊಂಡಿದೆ. ಇನ್ನೂ ಕಟ್ಟಡದಲ್ಲಿದ್ದ ಮೂವರು ಕಾರ್ಮಿಕರು ಬೆಂಕಿ ಕಾಣಿಸಿಕೊಳ್ಳುತ್ತಿದ್ದಂತೆ ಹೊರ ಓಡಿ ಬಂದಿದ್ದಾರೆ.

ಮಧ್ಯರಾತ್ರಿ ಬೆಂಕಿ ಕೆನ್ನಾಲಿಗೆಗೆ ಕಟ್ಟಡ ಸಂಪೂರ್ಣ ಹೊತ್ತಿ ಉರಿದಿದೆ. 10 ಜನ ಅಗ್ನಿ ಶಾಮಕ ಸಿಬ್ಬಂದಿ ಲ್ಯಾಡರ್ ಬಳಸಿ ಸುಮಾರು ಮೂರು ಗಂಟೆಗಳ ಕಾಲ ಕಾರ್ಯಾಚರಣೆ ನಡೆಸಿ ಬೆಂಕಿ ನಂದಿಸಿದ್ದಾರೆ.

ಇನ್ನು ಬೆಂಕಿ ನಂದಿಸುವ ವೇಳೆ ಓರ್ವ ಅಗ್ನಿಶಾಮಕ ಸಿಬ್ಬಂದಿ ನಾಲ್ಕನೇ ಮಹಡಿಯಿಂದ ಆಯತಪ್ಪಿ ಕೆಳಗೆ ಬಿದ್ದಿದ್ದಾರೆ. ನಿರ್ಮಾಣ ಹಂತದ ಕಟ್ಟಡವಾಗಿದ್ದರಿಂದ ಸುತ್ತಲೂ ನೆಟ್ ಹಾಕಲಾಗಿತ್ತು. ಹಾಗಾಗಿ ಪ್ರಾಣಾಪಾಯ  ಸಂಭವಿಸಿಲ್ಲ.

ಮಹದೇವಪುರ ಅಗ್ನಿಶಾಮಕ ಠಾಣೆಯ ಸಿಬ್ಬಂದಿ ವಿನಯ್ ಎಂಬವರು ಗಾಯಗೊಂಡಿದ್ದು, ಕೂಡಲೇ ಖಾಸಗಿ ಆಸ್ಪತ್ರೆಗೆ ರವಾನಿಸಲಾಗಿದೆ.

ವಿನಯ್ ಅವರ ಕೈ, ಕಾಲು ಮತ್ತು ತಲೆ ಭಾಗಕ್ಕೆ ಗಾಯಗಳಾಗಿದ್ದು, ಚಿಕಿತ್ಸೆ ನೀಡಲಾಗುತ್ತಿದೆ. ವಿನಯ್ ಅವರು ಏರಿಯಲ್ ಲ್ಯಾಡರ್ ಮೂಲಕ ಬೆಂಕಿ ನಂದಿಸುವ ಕಾರ್ಯಚರಣೆಯಲ್ಲಿ ತೊಡಗಿಕೊಂಡಿದ್ದರು


Sunday, January 9, 2022

ನೆಲಮಂಗಲ ಅಗ್ನಿಶಾಮಕ ಸಿಬ್ಬಂದಿಗಳಿಂದ ತಪ್ಪಿದ ಬಾರಿ ಅವಘಡ

 ನೆಲಮಂಗಲದಲ್ಲಿನ ಲೋಹಿತ್ ನಗರದ ಸ್ವಸ್ತಿಕ್ ಮಿಲ್ನಲ್ಲಿ ಬೆಂಕಿ ಆಕಸ್ಮಿಕ



ಸುದ್ದಿ ತಿಳಿದ ಕೂಡಲೇ ಸ್ಥಳಕ್ಕಾಗಮಿಸಿದ ನೆಲಮಂಗಲ ಅಗ್ನಿಶಾಮಕ ಸಿಬ್ಬಂದಿಗಳ ಮಿಂಚಿನ ಕಾರ್ಯಾಚರಣೆಯಿಂದ ತಪ್ಪಿದ ಬಾರಿ ಅವಘಡ.

Thursday, November 18, 2021

ಉರಿಯುತ್ತಿದ್ದ ಕಾರಿನ ಬೆಂಕಿಯನ್ನು ನಂದಿಸುವಾಗ ಅಗ್ನಿಶಾಮಕ ಸಿಬ್ಬಂದಿಯ ಮುಖದ ಮುಂದೆಯೇ ಬ್ಲಾಸ್ಟ್

 ಬುಧವಾರ 17/11/2021

ರಾಜಧಾನಿ ಬೆಂಗಳೂರಿನಲ್ಲಿ ಮತ್ತೊಂದು ಅಗ್ನಿ ದುರಂತ ಸಂಭವಿಸಿದೆ. ಬುಧವಾರ 17/11/2021ರ ತಡರಾತ್ರಿ ಮನೆಯ ಗೇಟ್​ ಮುಂದೆ ನಿಲ್ಲಿಸಿದ್ದ ಕಾರಿಗೆ ಬೆಂಕಿ ಹೊತ್ತಿಕೊಂಡಿದ್ದು, ಉರಿಯುತ್ತಿದ್ದ ಕಾರನ್ನ ನಂದಿಸುವಾಗ ಇಟ್ಟಮಡು ಬಳಿಯ ಮಂಜುನಾಥ ನಗರದಲ್ಲಿ ಸ್ಫೋಟ ಸಂಭವಿಸಿದೆ. ಅಗ್ನಿಶಾಮಕ ಸಿಬ್ಬಂದಿಯ ಮುಖದ ಮುಂದೆಯೇ ಬ್ಲಾಸ್ಟ್ ಸಂಭವಿಸಿದೆ.


ಬುಧವಾರ ತಡರಾತ್ರಿ ಮನೆಯ ಗೇಟ್​ ಮುಂದೆ ನಿಲ್ಲಿಸಿದ್ದ ಕಾರಿಗೆ ಬೆಂಕಿ ಹೊತ್ತಿಕೊಂಉರಿಯುತ್ತಿದ್ದ ಕಾರನ್ನ ನಂದಿಸುವಾಗಡಿದ್ದು, ಉರಿಯುತ್ತಿದ್ದ ಕಾರನ್ನ ನಂದಿಸುವಾಗ ಇಟ್ಟಮಡು ಬಳಿಯ ಮಂಜುನಾಥ ನಗರದಲ್ಲಿ ಸ್ಫೋಟ ಸಂಭವಿಸಿದೆ. ಅಗ್ನಿಶಾಮಕ ಸಿಬ್ಬಂದಿಯ ಮುಖದ ಮುಂದೆಯೇ ಬ್ಲಾಸ್ಟ್ ಸಂಭವಿಸಿದೆ. ಬೆಂಕಿ ನಂದಿಸುತ್ತಿದ್ದ ಮೂವರು ಪ್ರಾಣಾಪಾಯದಿಂದ ಜಸ್ಟ್ ಮಿಸ್ ಆಗಿದ್ದಾರೆ. ಮೂವರು ಅಗ್ನಿಶಾಮಕ ಸಿಬ್ಬಂದಿಗೆ ಗಾಯಗಳಾಗಿವೆ. ಬೆಂಕಿಯಿಂದ ಒಂದು ಕಾರು, ಎರಡು ಬೈಕ್ ಸುಟ್ಟು ಭಸ್ಮಗೊಂಡಿವೆ. ಕಿಶೋರ್ ಎಂಬುವರಿಗೆ ಸೇರಿದ ಮನೆ ಮತ್ತು ಕಾರು ಇದಾಗಿದೆ. ಹರೀಶ್, ರಾಜಶೇಖರ್ ಮತ್ತು ಮುತ್ತಪ್ಪ ಗಾಯಗೊಂಡಿರುವ ಅಗ್ನಿಶಾಮಕ ಸಿಬ್ಬಂದಿ.


ಏನಾಯ್ತು?: ಬೆಂಗಳೂರಿನಲ್ಲಿ ಆಕಸ್ಮಿಕ ಬೆಂಕಿಯಿಂದ ಕಾರು ಭಸ್ಮ ಪ್ರಕರಣದಲ್ಲಿ ಮೊದಲು ಮನೆಯಲ್ಲಿದ್ದ UPS ನಲ್ಲಿ ಬೆಂಕಿ ಕಾಣಿಸಿಕೊಂಡಿದೆ. ನಂತರ ಬೆಂಕಿಯ ಜ್ವಾಲೆಗಳು ಇಡೀ ಮನೆಯನ್ನೇ ಆವರಿಸಿದೆ. ಬಳಿಕ ಕಾಂಪೌಂಡ್‌ನಲ್ಲಿ ನಿಲ್ಲಿಸಿದ್ದ ಕಾರಿಗೂ ಬೆಂಕಿ ಹೊತ್ತಿಕೊಂಡಿದೆ. ಕಾರಿಗೆ ಬೆಂಕಿ ಹೊತ್ತಿದ ಬಳಿಕ ಸಿಲಿಂಡರ್ ಸ್ಫೋಟಗೊಂಡಿದೆ. ಸಿಲಿಂಡರ್ ಸ್ಫೋಟದಿಂದ ಮೂವರು ಸಿಬ್ಬಂದಿಗೆ ಗಾಯಗಳಾಗಿವೆ.



ಘಟನೆ ವೇಳೆ ಮನೆಯಲ್ಲಿದ್ದ ಮೂವರು ಅದೃಷ್ಟವಶಾತ್‌ ಪಾರಾಗಿದ್ದಾರೆ. ಬೆಂಕಿ ಬಿದ್ದ ಕೂಡಲೇ ಟೆರೇಸ್ ಮೂಲಕ ಮನೆಯಿಂದ ಹೊರಕ್ಕೆ ಬಂದಿದ್ದಾರೆ. ಟೆರೇಸ್‌ನಲ್ಲಿದ್ದ ಗೇಟ್ ಒಡೆದ ಈ ಮೂವರೂ, ಪಕ್ಕದ ಬಿಲ್ಡಿಂಗ್‌ಗೆ ಹೋಗಿ ಪ್ರಾಣ ಉಳಿಸಿಕೊಂಡಿದ್ದಾರೆ. ಬೆಂಕಿ ಅವಘಡದಲ್ಲಿ ಮನೆ, ಕಾರು, ಎರಡು ಬೈಕ್ ಸುಟ್ಟು ಭಸ್ಮಗೊಂಡಿವೆ.


Sunday, October 31, 2021

Miss you ಅಪ್ಪು ಅಣ್ಣ,


 ಕೆಲವು ಸಾವುಗಳು ನಮಗೆ ಸಂಬಂಧ ಇಲ್ಲದಿದ್ದರೂ ನಮ್ಮನ್ನೇ ಮೌನವಾಗಿಸುತ್ತವೆ, ಅಪ್ಪು ಅಣ್ಣನ್ನ ಒಂದ್ಸಾರಿನೂ ಭೇಟಿಯಾಗ್ದೇನೇ ಮಾತಾಡ್ದೆನೇ ಇದ್ರೂನು ಜನ ಇವತ್ತು ಅಳ್ತಾರೆ ಅಂದ್ರೆ ಜೀವನ್ದಲ್ಲಿ ಮುಖ್ಯವಾಗಿರೋದು ವ್ಯಕ್ತಿಯಲ್ಲ ವ್ಯಕ್ತಿತ್ವ. ನಾವ್ ಅವ್ರ ತರ ಎಲ್ಲಾ ಇರಕ್ಕಾಗಲ್ಲ ಅಂದ್ರು atleast time ಕೊಡೋರಿಗೆ time ಕೊಡಿ, ಪ್ರೀತಿ ಕೊಡೋರಿಗೆ ಪ್ರೀತಿ ಕೊಡಿ, ಹಣ ಎಷ್ಟಿದ್ದರೇನು ಋಣ ಇದ್ದಷ್ಟೇ ಜೀವನ, ಯಾಕಂದ್ರೆ ಬದುಕಿದ್ದಾಗಲೇ ಪ್ರೀತಿ ತೋರಿಸ್ಬೇಕು, ಕಳೆದುಕೊಂಡ ಮೇಲೆ ಬರೀ ನೆನಪಷ್ಟೇ, ಇವತ್ತು ಅಪ್ಪು ಅಣ್ಣ ನಾಳೆ ನಾವು ನೀವು.

Saturday, October 30, 2021

ನಮ್ಮಿಂದ ಈ ನಗು ಕಿತ್ತುಕೊಂಡ ದೇವರಿಗೆ ಧಿಕ್ಕಾರ

ಅಸಂಖ್ಯಾತ ಅಭಿಮಾನಿಗಳ ಹೃದಯದಲ್ಲಿ ಮನೆ ಮಾಡಿರುವ ಎಲ್ಲರ ಪ್ರೀತಿಯ ಅಪ್ಪು ಇಂದು ನಮ್ಮ ನಡುವೆ ಇಲ್ಲ ಎಂಬುದನ್ನು ಕಲ್ಪಿಸಿಕೊಳ್ಳಲು ಆಗುತ್ತಿಲ್ಲ. ಆ ನಗು, ಆ ಧ್ವನಿ, ಅವರ ಸರಳ ವ್ಯಕ್ತಿತ್ವ ಮತ್ತು ನೊಂದವರಿಗೆ ಸಹಾಯಾಸ್ತ ಚಾಚುವ ಗುಣ ಹಾಗೂ ಎಲ್ಲರ ಜೊತೆ ಪ್ರೀತಿಯಿಂದ ಬೆರೆಯುತ್ತಿದ್ದ ಪುನೀತ್​​ಗೆ ಪುನೀತನೇ ಸರಿಸಾಟಿ.


ನಮ್ಮಿಂದ ಶಾರೀರಿಕವಾಗಿ ದೂರವಾಗಿರುವ ಪುನೀತ್​, ಅವರು ಬಿಟ್ಟು ಹೋಗಿರುವ ಮೌಲ್ಯ, ಪ್ರೀತಿ ಹಾಗೂ ನಗುವಿನ ಮೂಲಕ ಶಾಶ್ವತವಾಗಿ ಉಳಿದಿದ್ದಾರೆ.



ಪ್ರತಿಯೊಂದು ಚಿತ್ರದಲ್ಲಿ ಸಾಮಾಜಿಕ ಕಳಕಳಿಯೊಂದಿಗೆ ಒಳ್ಳೆಯ ಸಂದೇಶ ನೀಡುತ್ತಿದ್ದ ಅಪ್ಪು ಕರ್ನಾಟಕದ ಮನೆ ಮಗನಾಗಿದ್ದಾರು. ಅಪ್ಪನ ನಡೆಯನ್ನೇ ಅನುಸರಿಸಿದ ಅಪ್ಪು ಎಲ್ಲರ ಹೃದಯದಲ್ಲೂ ಮನೆ ಮಾಡಿದ್ದರು. ಸಾಕಷ್ಟು ಅನಾಥಾಶ್ರಮ, ವೃದ್ಧಾಶ್ರಮ, ಹೆಣ್ಣು ಮಕ್ಕಳು ಶಿಕ್ಷಣ ಸೇರಿದಂತೆ ಲೆಕ್ಕವಿಲ್ಲದಷ್ಟು ಸಮಾಜಮುಖಿ ಕೆಲಸ ಮಾಡುತ್ತಿದ್ದ ಧೀಮಂತ ವ್ಯಕ್ತಿ ಇಂದು ನಮ್ಮ ಮುಂದೆ ಇಲ್ಲದಿರುವುದು, ಸಮಾಜಕ್ಕೆ ಆದ ಬಹು ದೊಡ್ಡ ನಷ್ಟವಾಗಿದೆ. ಕೆಲವರು ಪುನೀತ್​ ಅವರಲ್ಲಿ ದೇವರನ್ನು ಕಂಡಿದ್ದಾರೆ. ಅಂತಹ ಮಹಾನ್​ ಚೇತನ ಇಂದು ನಮ್ಮ ನಡುವೆ ಇಲ್ಲ ಎಂಬುದನ್ನು ನಿಜಕ್ಕೂ ಅರಗಿಸಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ದಯವಿಟ್ಟು ಇದೊಂದು ಕನಸಾಗಿ ಬಿಡಲಿ ಎಂದು ಎಲ್ಲರೂ ದೇವರಲ್ಲಿ ಪ್ರಾರ್ಥಿಸಿಕೊಳ್ಳುತ್ತಿರುವುದಂತೂ ಸತ್ಯ.


ಇನ್ನು ಅಪ್ಪು ವ್ಯಕ್ತಿತ್ವ ಎಂಥದ್ದು ಎನ್ನುವುದನ್ನು ಅವರ 'ರಾಜಕುಮಾರ' ಚಿತ್ರದ 'ಬೊಂಬೆ ಹೇಳುತೈತೆ ನೀನೆ ರಾಜಕುಮಾರ' ಹಾಡು ಸಾರಿ ಸಾರಿ ಹೇಳುತ್ತದೆ. ಚಿತ್ರರಂಗದಲ್ಲಿ ರಾಜನಂತೆ ಮೆರೆದ ಅಪ್ಪು, ಎಷ್ಟೋ ಮನೆಗೆ ಹೊಸ ಬೆಳಕಾಗಿ, ಎಷ್ಟೋ ಮನಗಳ ನೋವ ನೀಗಿಸಿ ದೀಪವಾಗುವ ಮೂಲಕ ಎಲ್ಲರು ಆರಾಧಿಸುವ ರಾಜರತ್ನನಾಗಿದ್ದಾರೆ.


ಸಾಕಷ್ಟು ಸೋಲು-ಗೆಲುವುಗಳನ್ನು ಕಂಡಿರುವ ಪುನೀತ್, ಆಡಿಸಿಯೆ ನೋಡು ಬೀಳಿಸಿಯೆ ನೋಡು ಎಂದು ಸೋಲದು ಸೋತು ತಲೆಯ ಬಾಗದು ಎನ್ನುವಂತೆ ಜೀವನದಲ್ಲಿ ಎಂದು ಕುಗ್ಗಲಿಲ್ಲ. ವರ್ಷಕ್ಕೆ ಎರಡ್ಮೂರು ಚಿತ್ರಗಳಲ್ಲಿ ಅಭಿನಯಿಸುತ್ತಿದ್ದ ಪುನೀತ್​ ಈ ಮೂಲಕ ಪರೋಕ್ಷವಾಗಿ ಸಾಕಷ್ಟು ಜನರ ಜೀವನಕ್ಕೆ ಆಸರೆಯಾಗಿದ್ದರು. ಎಂದು ಯಾರ ಮುಂದೆಯು ಸೋಲದ ಪುನೀತ್​, ಎಲ್ಲರ ರಾಜಕುಮಾರನೇ ಸರಿ. ​


ತಂದೆ ಮೇರು ನಟನಾದರೂ ಅಪ್ಪುಗೆ ಅದರ ಬಗ್ಗೆ ಅಹಂ ಎಂದೂ ಇರಲಿಲ್ಲ. ತುಂಬಾ ಸರಳ ವ್ಯಕ್ತಿಯಾದ ಪುನೀತ್​, ಗುಡಿಸಲೇ ಆಗಲಿ, ಅರಮನೆ ಆಗಲಿ ಎಂದು ಆಟ ನಿಲ್ಲದು ಎನ್ನುವಂತೆ ಎಲ್ಲರೊಂದಿಗೆ ಬೆರೆತು ಸಾಮಾನ್ಯ ವ್ಯಕ್ತಿಯಂತೆ ಜೀವಿಸಿದವರು. ಅದಕ್ಕೆ ಉದಾಹರಣೆಯಾಗಿ ಕೆಲವೇ ದಿನಗಳ ಹಿಂದೆ ಡಾಕ್ಯುಮೆಂಟರಿ ಶೂಟಿಂಗ್​ಗಾಗಿ ಕೊಪ್ಪಳದ ಅಂಜನಾದ್ರಿ ಪರ್ವತಕ್ಕೆ ಆಗಮಿಸಿದ ಪುನೀತ್​, ಗಂಗಾವತಿ ಸಮೀಪದ ಹಳ್ಳಿಗಳಲ್ಲಿ ಸುತ್ತಾಟ ನಡೆಸಿ ಹಲವು ಊರುಗಳಿಗೆ ಭೇಟಿ ನೀಡಿದ್ದರು. ಈ ವೇಳೆ ಪುನೀತ್​ ಅವರು ಸಾಮಾನ್ಯರಂತೆ ನೆಲದ ಮೇಲೆ ಕುಳಿತು ಕುರಿಗಾಯಿಗಳು ನೀಡಿದ ಸಂಗಟಿ‌ ಸವಿದು ‌ಸಂಭ್ರಮಿಸಿದ್ದರು. ಇದಕ್ಕೆ ಸಂಬಂಧಪಟ್ಟ ಫೋಟೋ ಮತ್ತು ವಿಡಿಯೋಗಳು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡಿ, ಪುನೀತ್​ ಸರಳತೆ ಕಂಡು ಭಾವುಕರಾಗಿದ್ದರು.


ಹಿರಿಯರೆ ಇರಲಿ ಕಿರಿಯರೆ ಬರಲಿ ಬೇಧವ ತೋರದು ಎಂದು ಬೇಧ ತೋರದು ಎಂಬ ಸಾಲು ಅಪ್ಪು ವ್ಯಕ್ತಿತ್ವದಿಂದಲೇ ಹುಟ್ಟಿಕೊಂಡಿದೆ ಎಂದರೆ ತಪ್ಪಾಗಲಾರದು. ಯಾವುದೇ ಸಭೆ, ಸಮಾರಂಭಗಳಿಗೆ ಹೋದರು ಪುನೀತ್​ ಹಿರಿಯರಿಗೆ ಗೌರವ ಸೂಚಿಸುತ್ತಿದ್ದರು. ತಮಗಿಂತ ಕಿರಿಯವರನ್ನು ಕೂಡ ಗೌರವ ಕೊಟ್ಟೆ ಮಾತನಾಡಿಸುತ್ತಿದ್ದರು. ನಾನೊಬ್ಬ ಸ್ಟಾರ್​ ಎಂಬುದನ್ನು ಎಂದಿಗೂ ಜನರ ಮುಂದೆ ಅಪ್ಪು ತೋರಿಸಿಕೊಂಡವರಲ್ಲ.


ಪುನೀತ್​ಗೆ ಯಾವುದರಲ್ಲೂ ಕಡಿಮೆ ಆಗಿರಲಿಲ್ಲ. ಸಾಕಷ್ಟು ಹಣವಿದ್ದರೂ ಅದನ್ನು ಮೀರಿಸುವಷ್ಟು ಹೃದಯ ಶ್ರೀಮಂತ್ರಿಕೆಯನ್ನು ಹೊಂದಿದ್ದರು. ಎಲ್ಲ ಇದ್ದು ಏನು ಇಲ್ಲದ ಹಾಗೆ ಬದುಕಿ ತೋರಿದಂತಹ ವ್ಯಕ್ತಿತ್ವ. ತೆರೆಯ ಹಿಂದೆ ಸಾಕಷ್ಟು ಸಮಾಜಮುಖಿ ಕೆಲಸ ಮಾಡಿದ ಅಪ್ಪು ಅವರದ್ದು ಆಕಾಶ ನೋಡದ ಕೈ. ಅವರಿದ್ದ ಕಡೆಯಲೆಲ್ಲ ಪ್ರೀತಿ ಹಂಚಿವುದೇ ಅವರ ಬೆಲೆ ಕಟ್ಟಲಾಗದ ಗುಣ.


ಜೊತೆಗಿರು ನೀನು ಅಪ್ಪನ ಹಾಗೆ, ಹಣ್ಣೆಲೆ ಕಾಯೊ ವಿನಯಿದಿ ಹೀಗೆ ಎಂಬಂತೆ ಹೆತ್ತ ಮಕ್ಕಳಿಂದ ದೂರಾದ ಅನೇಕ ಹಿರಿಯರಿಗೆ ಮಗ ಹಾಗೂ ತಂದೆಯ ಸ್ಥಾನದಲ್ಲಿ ನಿಂತು ಅವರ ಕೊನೆಯ ಕಾಲದ ಜೀವನ ಸುಖಮಯವಾಗಿಸಿದವರಲ್ಲಿ ಪುನೀತ್​ ಒಂದು ಹೆಜ್ಜೆ ಮುಂದು. ಸಾಕಷ್ಟು ವೃದ್ಧಾಶ್ರಮ ಹಾಗೂ ಅನಾಥಾಶ್ರಮ ನಡೆಸುತ್ತಿರುವ ಪುನೀತ್ ಅನೇಕರ ಬಾಳಿನ ಭರವಸೆ ಆಗಿದ್ದರು. ​


ನಿಜಕ್ಕೂ ನಿನ್ನನು (ಪುನೀತ್​) ಪಡೆದ ನಾವು ಪುನೀತರೇ.. ಸದಾ ಕಾಲ ನಗು ನಗುತ ಬಾಳು ಎಂದು ಹಾರೈಸಿದ ಅಸಂಖ್ಯಾತ ಅಭಿಮಾನಿಗಳ ಪ್ರಾರ್ಥನೆ ಫಲಿಸಲೇ ಇಲ್ಲ. ಅರ್ಧಕ್ಕೆ ಅನೇಕರನ್ನು ಅನಾಥರನ್ನಾಗಿ ಮಾಡಿ ಹೊರಟರು ಅಪ್ಪು. ನಿಜಕ್ಕೂ ಈ ಸಾವು ನ್ಯಾಯವೇ? ತಾನೆ ಉರಿದು ಮನೆಗೆ ಬೆಳಕು ಕೊಡುವ ದೀಪವಂತೆ ಬಹುತೇಕರ ಪಾಲಿಗೆ ಪುನೀತ್​ ನಂದಾ ದೀಪವಾಗಿದ್ದರು. ಆದರೆ, ಆಡಿಸುವಾತನ ಕರುಣೆಯ ಮೇಲೆ ನಮ್ಮ ಪಾತ್ರವು ನಿಂತಿದೆ ಮತ್ತು ಸಮಯದ ಸೂತ್ರ ಅವನದು (ದೇವರು) ಎನ್ನುವ ಮಾತು ಅಪ್ಪು ವಿಚಾರದಲ್ಲೂ ನಿಜವಾಯಿತು. ಆದರೆ, ಇನ್ನಷ್ಟು ವರ್ಷ ನಮ್ಮನ್ನು ರಂಜಿಸುತ್ತಾರೆ ಅಂದುಕೊಂಡಿದ್ದಾಗಲೇ ದೇವರು ಅವರ ಪಾತ್ರವನ್ನು ಮುಗಿಸಿ ಬೇಗ ಕರೆಸಿಕೊಂಡುಬಿಟ್ಟ. ಹೀಗಾಗಿಯೇ ಇಂದು ಅಸಂಖ್ಯಾತ ಜನರು ದೇವರಿಗೆ ಹಿಡಿ ಶಾಪ ಹಾಕುತ್ತಿದ್ದಾರೆ.


ಏನೇ ಆದರೂ ಬೊಂಬೆ ಹೇಳಿದ ಒಂದು ಮುತ್ತಿನ ಕಥೆಯಯಲ್ಲಿದ್ದ ರಾಜ, ಈ ರಾಜಕುಮಾರನೇ. ಯೋಗವು ಒಮ್ಮೆ ಬರುವುದು ನಮಗೆ, ಯೋಗ್ಯತೆ ಒಂದೆ ಉಳಿವುದು ಕೊನೆಗೆ ಎನ್ನುವಂತೆ ಲೆಕ್ಕವಿಲ್ಲದಷ್ಟು ಅಭಿಮಾನಿಗಳಲ್ಲಿ ಎಂದಿಗೂ ಆರದ ದೀಪವಾಗಿಯೇ ಅಪ್ಪು ಅಜರಾಮರವಾಗಿ ಉಳಿದುಕೊಂಡಿದ್ದಾರೆ. ಈ ಜಗತ್ತಿಗೆ ಸೂರ್ಯನು ಒಬ್ಬನೇ, ಚಂದ್ರನು ಒಬ್ಬನೇ ಕನ್ನಡ ಚಿತ್ರರಂಗಕ್ಕೆ ಈ ರಾಜನೂ ಒಬ್ಬನೇ. ಬೊಂಬೆ ಹೇಳುತೈತೆ ಮತ್ತೆ…. ಹೇಳುತೈತೆ ನೀನೆ ರಾಜಕುಮಾರ….


ಹಾಡಿನ ಸಂಪೂರ್ಣ ಸಾಲು


ಬೊಂಬೆ ಹೇಳುತೈತೆ

ಮತ್ತೆ ಹೇಳುತೈತೆ

ನೀನೆ ರಾಜಕುಮಾರ


ಬೊಂಬೆ ಹೇಳುತೈತೆ

ಮತ್ತೆ ಹೇಳುತೈತೆ

ನೀನೆ ರಾಜಕುಮಾರ


ಹೊಸ ಬೆಳಕೊಂದು ಹೊಸಿಲಿಗೆ ಬಂದು

ಬೆಳಗಿದ ಮನೆಯ ಮನಗಳ ಇಂದು

ಆರಾಧಿಸೊ ರಾರಾಧಿಸೊ ರಾಜರತ್ನನು


ಆಡಿಸಿಯೆ ನೋಡು ಬೀಳಿಸಿಯೆ ನೋಡು

ಎಂದು ಸೋಲದು ಸೋತು ತಲೆಯ ಬಾಗದು


ಬೊಂಬೆ ಹೇಳುತೈತೆ

ಮತ್ತೆ ಹೇಳುತೈತೆ

ನೀನೆ ರಾಜಕುಮಾರ


ಗುಡಿಸಲೆ ಆಗಲಿ ಅರಮನೆ ಆಗಲಿ

ಆಟವೆ ನಿಲ್ಲದು

ಎಂದು ಆಟ ನಿಲ್ಲದು

ಹಿರಿಯರೆ ಇರಲಿ ಕಿರಿಯರೆ ಬರಲಿ

ಬೇಧವೆ ತೋ ರದು ಎಂದು ಬೇಧ ತೋರದು


ಎಲ್ಲ ಇದ್ದು ಏನು ಇಲ್ಲದ ಹಾಗೆ ಬದುಕಿರುವ

ಆಕಾಶ ನೋಡದ ಕೈಯ ನಿನದು

ಪ್ರೀತಿ ಹಂಚಿರುವ


ಜೊತೆಗಿರು ನೀನು ಅಪ್ಪನ ಹಾಗೆ

ಹಣ್ಣೆಲೆ ಕಾಯೊ ವಿನಯಿದಿ ಹೀಗೆ


ನಿನ್ನನು ಪಡೆದ ನಾವು ಪುನೀತ

ಬಾಳು ನಗು ನಗುತ


ಬೊಂಬೆ ಹೇಳುತೈತೆ

ಮತ್ತೆ ಹೇಳುತೈತೆ

ನೀನೆ ರಾಜಕುಮಾರ


ತಾನೆ ಉರಿದು ಮನೆಗೆ ಬೆಳಕು ಕೊಡುವ ದೀಪವಿದು

ನಂದಾ ದೀಪವೇ ಇದು

ಆಡಿಸುವಾತನ ಕರುಣೆಯ ಮೇಲೆ ನಮ್ಮ ಪಾತ್ರವು

ಸಮಯದ ಸೂತ್ರ ಅವನದು


ಒಂದು ಮುತ್ತಿನ ಕಥೆಯ ಹೇಳಿತು ಈ ಬೊಂಬೆ

ಆ ಕಥೆಯಲ್ಲಿದ್ದ ರಾಜನಂಗೆ ನೀನು ಬಂದೆ


ಯೋಗವು ಒಮ್ಮೆ ಬರುವುದು ನಮಗೆ

ಯೋಗ್ಯತೆ ಒಂದೆ ಉಳಿವುದು ಕೊನೆಗ


ಸೂರ್ಯನೊಬ್ಬ ಚಂದ್ರನೊಬ್ಬ

ರಾಜನೂ ಒಬ್ಬ

ಈ ರಾಜನೂ ಒಬ್ಬ


ಆಡಿಸಿಯೆ ನೋ ಡು ಬೀಳಿಸಿಯೆ ನೋಡು

ಎಂದು ಸೋಲದು ಸೋತು ತಲೆಯ ಬಾಗದು


ಬೊಂಬೆ ಹೇಳುತೈತೆ

ಮತ್ತೆ ಹೇಳುತೈತೆ

ನೀನೆ ರಾಜಕುಮಾರ

Tuesday, October 26, 2021

ದೀಪಾವಳಿ ಹಬ್ಬದಂದು ಎಲ್ಲಾ ದೇವಸ್ಥಾನದಲ್ಲಿ ಗೋಪೂಜೆ ಮಾಡಲು ರಾಜ್ಯ ಸರ್ಕಾರದಿಂದ ಆದೇಶ

 ದೀಪಾವಳಿ ಹಬ್ಬದಂದು ರಾಜ್ಯ ಸರ್ಕಾರದ ಅಧೀನದಲ್ಲಿ ಬರುವ ಮುಜರಾಯಿ ಇಲಾಖೆಯ ಎಲ್ಲಾ ದೇವಸ್ಥಾನದಲ್ಲಿ ಗೋಪೂಜೆ ಮಾಡಲು ರಾಜ್ಯ ಸರ್ಕಾರದಿಂದ ಆದೇಶ ನೀಡಿದೆ

ರಾಜ್ಯ ಸರ್ಕಾರದ ಮುಜರಾಯಿ ಇಲಾಖೆಯ ಅಡಿಯಲ್ಲಿ ಬರುವ ಎಲ್ಲಾ ದೇವಸ್ಥಾನಗಳಲ್ಲಿ ನವೆಂಬರ್‌ 5ರಂದು ಆಚರಣೆ ಮಾಡುವ ಬಲಿಪಾಡ್ಯಮಿಯಂದು ಗೋವಿನ ಪೂಜೆಯನ್ನು ಅಂದು ಸಂಜೆ 5.30ರಿಂದ 6.30ರ ಗೋಧೂಳಿ ಲಗ್ನದಲ್ಲಿ ಪೂಜೆ ಮಾಡುವಂತೆ ಆದೇಶ ನೀಡಲಾಗಿದೆ.

ಬಲಿ ಪಾಡ್ಯಮಿಯಂದು ನಡೆಯುವ ಗೋ ಪೂಜೆ

ದೀಪಾವಳಿ ಹಬ್ಬದ ಸಂಭ್ರಮದಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಗೋ ಪೂಜೆ ಕೂಡ ಪ್ರಮುಖ ಸ್ಥಾನವನ್ನು ಪಡೆದಿದೆ.ಮನೆಯಲ್ಲಿರುವ ದನ ಕರುಗಳಿಗೆ ಅಲಂಕರಿಸಿ, ಅವುಗಳಿಗೆ ಪೂಜೆ ಮಾಡಿ, ತಿಂಡಿತಿನಿಸುಗಳನ್ನು ನೀಡುವ ಸಂಪ್ರದಾಯವು ಈಗಲೂ ನಡೆದು ಬಂದಿದೆ.m

ಮಹಾಭಾರತದ ಕಾಲಘಟ್ಟದಲ್ಲಿ ಕಾರ್ತಿಕ ಶುದ್ಧ ಪಾಡ್ಯದ ದಿನದಂದು ಶ್ರೀ ಕೃಷ್ಣ ಗೋವರ್ಧನ ಗಿರಿಯನ್ನು ಎತ್ತಿ ಹಿಡಿದು ಗೋಪಾಲಕರಿಗೆ ರಕ್ಷಣೆ ನೀಡಿದ ಎಂಬ ಪ್ರತೀತಿಯೂ ಇದೆ. ಈ ದಿನದಂದು ಗೋವರ್ಧನ, ಗೋ ಪೂಜೆಯನ್ನು ಮಾಡುವ ಸಂಪ್ರದಾಯವಿದೆ. ಕೃಷ್ಣ, ಗೋಪ-ಗೋಪಿಯರ, ಇಂದ್ರ, ಹಸುಗಳ, ಕರುಗಳ ಚಿತ್ರಗಳನ್ನು ಜೋಡಿಸಿ ಮೆರವಣಿಗೆ ಮಾಡುತ್ತಾರೆ. ಗೋಪೂಜೆಯನ್ನು ಬಲಿಪಾಡ್ಯಮಿ ದಿನದಂದು ಆಚರಣೆ ಮಾಡಲಾಗುತ್ತದೆ. ಬಲಿಚಕ್ರವರ್ತಿಯ ಸಾಮ್ರಾಜ್ಯದಲ್ಲಿ ಗೋವುಗಳಿಗೆ ಅತಿಯಾದ ಮಹತ್ವ ನೀಡಲಾಗುತ್ತಿತ್ತು. ಅದಕ್ಕೆ ಪೂಜೆಗಳನ್ನು, ಆರಾಧನೆಯನ್ನು ಮಾಡಲಾಗುತ್ತಿತ್ತು. ಅದರ ಸವಿನೆನಪಿಗಾಗಿ ಬಲಿಪಾಡ್ಯಮಿ ದಿವಸ ಗೋವುಗಳಿಗೆ ಪೂಜೆ ಸಲ್ಲಿಸಲಾಗುತ್ತದೆ. ಇನ್ನು ಹೆಚ್ಚಿನ ಕಡೆಗಳಲ್ಲಿ ಆ ದಿನದಂದು ಹಸುವಿನ ಹಾಲನ್ನೂ ಕರೆಯಬಾರದೆಂಬ ಪ್ರತೀತಿ ಇದೆ. ಕರುಗಳು ಬೇಕಾದಷ್ಟು ಹಾಲು ಕುಡಿದು ಸಂತೋಷವಾಗಿರಬೇಕೆಂಬುದು ಇದರ ಉದ್ದೇಶ.

Restolex ಹಾಸಿಗೆ ತಯಾರಿಕಾ ಕಾರ್ಖಾನೆಯಲ್ಲಿ ಅಗ್ನಿ ದುರಂತ

 ನೆಲಮಂಗಲ ಸಮೀಪದ ಟಿ ಬೇಗೂರು ಗ್ರಾಮದಲ್ಲಿ Restolex ಎಂಬ ಹಾಸಿಗೆ ತಯಾರಿಕಾ ಕಾರ್ಖಾನೆಯಲ್ಲಿ ಅಗ್ನಿ ಅವಘಡ ಸಂಭವಿಸಿದ್ದು, ಅಪಾರ ಪ್ರಮಾಣದ ಮಿಷನರಿ, ಕಚ್ಛಾ ಮತ್ತು ಸಿದ್...